नेटवर्किङमा ठगिने थपिए

Image result for image of network

 साइन ग्रुपका नाममा काठमाडौं आएर पिरामिड शैलीको नेटवर्किङ विस्तार गर्न आएका २० भारतीय पक्राउसँगै थप पीडित प्रहरीको सम्पर्कमा आएका छन् । प्रहरी परिसर काठमाडौंले बुधबार थप तीन पीडितको निवेदन दर्ता गरेको छ ।

उनीहरूले नेटवर्कको सदस्य बन्ने भन्दै २० लाख ८० हजार ५ सय रुपैयाँ फसाएको बताएका छन् । यसअघि नै परिसरमा १ करोड ६० लाख फसाएका तीन जनाले नेटवर्क सञ्चालकविरुद्ध उजुरी दिएका थिए ।

प्रहरी परिसर काठमाडौंका प्रवक्ता डीएसपी होबिन्द्र बोगटीले थप १७ पीडित सम्पर्कमा आएको र उनीहरू निवेदन दर्ता गराउने क्रममा रहेको बताए । प्रहरीले वैशाख २८ मा साइन ग्रुपका नाममा काठमाडौं आएर पिरामिड शैलीको नेटवर्किङ विस्तार गर्न आएका १२ भारतीयलाई पक्राउ गरेको थियो ।
सोमबार प्रहरीले उक्त समूहका थप आठ सदस्यलाई स्रोत नखुलेको ४२ लाख रुपैयाँसहित ठमेल र बबरमहलस्थित सरकारी वकिलको कार्यालय नजिकबाट पक्राउ गरेको थियो । स्रोतका अनुसार सरकारी वकिललाई घूस दिन उनीहरूले त्यति धेरै रकम बोकेको अनुमान छ ।
होटल याक एन्ड यतीबाट वैशाख २८ मा पक्राउ परेका १२ जनाले नै आफू भारतीय नागरिक भएको बताए पनि दुई जनाको साथबाट प्रहरीले नेपाली नागरिकता बरामद गरेको थियो । उत्तर प्रदेश घर बताउने गिरीश उपाध्याय र आयुष उपाध्यायको साथबाट प्रहरीले नेपाली नागरिकता र आयुषको साथबाट नेपाली राहदानी बरामद गरेको हो । मुद्दा कमजोर बनाउनकै लागि उनीहरूले परिचय ढाटेको प्रहरीको आकलन छ ।
जिल्ला प्रशासन कार्यालय पर्साबाट जारी भएको नागरिकताको वैधता जाँच्न प्रहरीले प्रक्रिया अगाडि बढाएको छ । डीएसपी बोगटीले मुद्दा प्रभावित पार्नकै लागि उनीहरूले आफूलाई भारतीय बताएको हुन सक्ने बताए । प्रहरीका अनुसार गिरीश साइन ग्रुपका प्रेसिडेन्टका रूपमा कार्यरत छ ।
यो तथ्यले दुबईमा प्रधान कार्यालय तथा भारतको लखनउ, हङकङ र मौरिससमा शाखा कार्यालय रहेको बताउँदै पिरामिड शैलीको नेटवर्क व्यवसाय विस्तार गर्न खोज्ने समूहको नेतृत्व नेपालीले गरेको र यसमा भारतीयहरूको संलग्नता रहेको पुष्टि हुन्छ ।
नेटवर्कको सदस्य विस्तार गर्ने भन्दै यो समूहले काठमाडौंको याक एन्ड यती होटलमा अभिमुखीकरणको कार्यशाला राखेको थियो । न्यूनतम १२ सय ५० डलर जम्मा गरेर खाता खोल्न सकिने, जसमा कम्पनीले त्यति नै रकम थप गरिदिने र ६ महिनापछि क्रेडिट कार्ड पाइने बताउँदै कम्पनीले सदस्यता विस्तार सुरु गरेको देखिन्छ ।
खातामा २५ सय डलर जम्मा भएपछि प्रत्येक महिना ५ प्रतिशत कमिसन पाइने र नयाँ सदस्य बढाउन सके १५ प्रतिशतसम्म कमिसन पाइने प्रलोभन देखाइएको थियो । १९ मेसम्म बम्पर अफर रहेको र यो अवधिमा खातामा रकम जम्मा गरे १० देखि १५ प्रतिशत कमिसन पाउने अफर पनि कम्पनीले ल्याएको थियो ।
प्रहरीका अनुसार बाजुरा र ललितपुरको सातदोबाटो पनि घर भएको बताउने महेन्द्र सिंहले नेटवर्क विस्तार भन्दै धेरैसँग रकम उठाएको आकलन छ । महेन्द्रका आफन्ती लोकेन्द्र सिंहले नुवाकोटकी शारदा अधिकारी, उनका बाबु र दिदीसँग मात्रै नेटवर्कको सदस्य बने सजिलै पैसा कमाइने भन्दै ४५ लाख उठाएका थिए । प्रहरीले सुदूरपश्चिमका जिल्लामा सम्पर्क भएका महेन्द्रले उक्त भेगका धेरैसँग रकम उठाएको अनुमान गरेको छ ।

Leave a Reply

Your email address will not be published. Required fields are marked *

RSS
Follow by Email
Facebook
Twitter